Süni intellekt ayinləri real vaxtda tərcümə edəcək

Papal Basilica of Saint Peter süni intellekt əsaslı canlı tərcümə xidmətini istifadəyə verib. Yeni sistem Müqəddəs ayinlərdə iştirak edən ziyarətçilərə liturgiyanı real vaxtda 60 fərqli dildə izləməyə imkan yaradacaq.

Layihə Vatikan ilə Translated şirkətinin əməkdaşlığı çərçivəsində həyata keçirilib. Bildirilir ki, xidmət həm audio, həm də mətn formatında canlı tərcümə təqdim edir. Ziyarətçilər bazilikada yerləşdirilən QR kodu skan etməklə birbaşa veb səhifə üzərindən tərcüməyə qoşula biləcəklər. Bunun üçün ayrıca mobil tətbiq yükləməyə ehtiyac yoxdur. Bazilikanın arxipriesti Kardinal Mauro Gambetti açıqlamasında bildirib ki, Müqəddəs Pyotr Bazilikası əsrlərdir müxtəlif millət və dillərdən olan möminləri qəbul edir. Onun sözlərinə görə, liturgiyanın daha çox insan tərəfindən başa düşülməsi Katolik Kilsəsinin “universal missiyasına” xidmət edir.

Texnologiyanın əsasında Translated şirkətinin 2024-cü ildə təqdim etdiyi “Lara” adlı süni intellekt tərcümə sistemi dayanır. Şirkət iddia edir ki, bu alqoritm 500 mindən çox ana dili daşıyıcısı olan peşəkar tərcüməçinin dil həssaslığından ilhamlanaraq hazırlanıb və konteksti daha dəqiq anlama qabiliyyətinə malikdir.