Muxtar respublikada poçt xidmətləri genişləndirilir

         Naxçıvan Muxtar Respublikası Rəqəmsal İnkişaf və Nəqliyyat Nazirliyi  tərəfindən sakinlərə göstərilən bütün növ xidmətlərin o cümlədən, poçt, rabitə və nəqliyyat  xidmətlərinin keyfiyyətinin yüksəldilməsi  istiqamətində bir sıra tədbirlər  həyata keçirilir.        

        Azərbaycan Respublikası Prezidentinin 2023-cü il tarixli 5 iyun tarixli  Sərəncamı ilə təsdiq edilmiş “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı”nın icrası  muxtar respublikada poçt xidmətlərinin  keyfiyyətinin artırılmasına zəmin yaradacaqdır.

        Nazirliyin tabeli  qurumu olan “Naxçıvanpoçt” publik hüquqi şəxsinin Naxçıvan şəhərində, rayon mərkəzlərində və kəndlərdəki poçt bölmələri tərəfindən göstərilən poçt xidmətləri ilə yanaşı,   Naxçıvan “ASAN xidmət” mərkəzində də   göstərilən poçt xidmətləri  4 mart 2024-cü il tarixdən nağdsız yolla həyata  keçirilir.

     Yerli bələdiyyə vergilərinin ödənilməsi, eləcə də istehlakçılar  tərəfindən sərf olunan  qaz, elektrik enerjisi, su,  rabitə  və internet xidmətlərinin  dəyərini Naxçıvan “ASAN xidmət” mərkəzində yerləşən müvafiq bank xidmətinə  ödədikdən sonra  bank tərəfindən verilmiş qəbzi  poçt  xidmətləri pəncərəsinə  təqdim etməklə, mövcud  bazada müvafiq   ödənişlər qeydiyyata alınır.

        Həyata keçirilən kompleks tədbirlərin davamı olaraq  1 iyun 2024- cü il tarixdən etibarən  Nazirliyin  tabeli qurumu “Naxçıvanpoçt” tərəfindən muxtar respublikada poçt xidmətlərinin çeşidinin artırılması və xidmət portfelinin genişləndirilməsi məqsədilə daşıma şirkəti olan “MOREX” Məhdud Məsuliyyətli Cəmiyyəti ilə  müqavilə bağlanılıb.  

   Bağlanılmış müqaviləyə uyğun olaraq qısa zamanda proqram təminatı uyğunlaşdırılıb  qlobal  “Trendyol”, “TEMU” və.s saytlardan sifariş edilmiş məhsulların ünvana çatdırılması təmin ediləcəkdir.

    Xidmətin muxtar respublikanın kəndlərini də əhatə etməsi nəzərdə  tutulur. Həyata  keçirilən  bu tədbir əhalinin  müasir   poçt xidmətlərləri ilə əhatə olunmasına öz töhfəsini verməklə yanaşı, vətəndaş məmnunluğunun  artırılması  istiqamətində  də mühüm amildir.