Mülki müdafiə anlayışı, rolu və vəzifələri mövzusunda vebinar keçirilib

Hər il martın 1-i Beynəlxalq Mülki Müdafiə Təşkilatının qərarı ilə Ümumdünya Mülki Müdafiə Günü kimi qeyd olunur

Bu gün ilə əlaqədar Naxçıvan Muxtar Respublikası Rəqəmsal İnkişaf və Nəqliyyat Nazirliyi “Sosial tədbirlər layihəsi” çərçivəsində 1 mart 2024-cü il tarixdə vebinar keçirib. Nazirliyin əməkdaşı Hidayət Əlizadə mülki müdafiənin rolu, quruluşu, məqsədi və vəzifələri haqqında slaydlar vasitəsilə iştirakçılara məlumat verib.

Bildirilib ki, əhalinin mühafizəsini təşkil etmək, fövqəladə hallardan mühafizə sahəsində hazırlığı təmin etmək mülki müdafiə orqanları qarşısında duran başlıca vəzifələrdəndir. Hazırda Ümumdünya Mülki Müdafiə təşkilatına 50-dən çox ölkə daxildir və ölkəmiz 1993-cü ildən bu təşkilatın üzvüdür.

Həmçinin, vebinarda fövqəladə hadisələr zamanı davranış qaydaları, fövqəladə hallarda qorunma ilə bağlı mövcud imkanlar,  fərdi mühafizə vasitələrindən istifadə qaydaları, havadan hücum, zəhərlənmə və digər təhlükələrdən mühafizə üsulları, o cümlədən ətraf mühit və təhlükəsizlik məsələləri barəsində maarifləndirici söhbətlər aparılıb.

Qeyd edək ki, vebinara Nazirliyin Aparatının və tabeli qurumlarının əməkdaşları, o cümlədən istehsalat təcrübəsində olan tələbələr qoşulublar.